Sunday, June 28, 2020

මින්නේරිය වැව

මහසෙන් මහ රජු යක්ෂ සහයෙන් කරවූ මින්නේරිය වැවේ ඔබ නොදන්නා කතාවයි මේ මහසෙන් රජුට හත් රජ්ජුරු බණ්ඩාර දෙවියෝ නොහොත් මින්නේරි දෙවියෝ’යි කියන්නට තරම් ඔහු වෙනුවෙන් දේවාල තනවන්නට තරම් සියවස් 17ක් තිස්සේ ඔහු වෙනුවෙන් නොකඩවා පුද පූජා කරන්නට තරම් භක්තියක් රට වැසි ජනතාවට තිබිණි. වෛතුල්‍යවාදය මුල්කර ගත් සංඝමිත්‍ර තෙරුන්ගේ බහට වැඩ කර මහසෙන් රජතුමා මුලදී මහා විහාරය අමනාප කරගත්තේය. එය බොහෝ ප්‍රශ්නවලට මුල්විය. අගනුවර වූ අනුරාධුපුරයේ රැඳී සිටින්නට බැරි තරමට වාතාවරණය දරුණු වූ බැවින් හබරණ කැකිරාව මාර්ගයේ රිටිගල කන්දේ පදිංචියට මහසෙන් පැමිණි බවට නටබුන් අදත් එහි ඇතැයි සඳහන්ය. මහ වැවකටම සරිලන මෙනේරි වැවී තිබෙන භූමි භාගයක් මාතලේ දඹුලු කඳුවැටි පාමුල සිට ගව් කිහිපයක් ඈතින් තිබෙන බවත් එය නිතර ජලයෙන් පිරී තිබෙන බවත් එහි මහ වැවක් තැනුවහොත් පළාතම එකම කෙත් යායක් වනු ඇතැයි චරපුරුෂයන් විසින් රජතුමාට දැන්වූ බව පැවසේ. ඉන්පසු චරපුරුෂයින් රිටිගල සිට හතර අතට යැවූ බව ද කියති. වියළි කලාපයක් වූ මේ පළාතේ තිබූ විශාල ප්‍රශ්නය ජලය හිඟකමයි. කුඩා වැව් රැසක් සාදා ලොව දැවැන්තම ගඩොල් ව්‍යුහය වූ ජේතවනාරාමය චෛත්‍ය කර්මාන්තයට අත ගසා තිබූ මහසෙන් රජ ලැබුණු මේ ආරංචියෙන් සතුටට පත්වී තිබේ. ඒ බිමේ පස මැටි ගතියෙන් සාර ජලය කාන්දු වී නොයන ආකාරයේ බිමක් බවද ඒ වන විටත් එහි ජලය පිරී තිබීමෙන් සනාථ වී ඇත. ඒ භූමිය දෙපස කඳු දෙකක් තිබෙන බවත් ඒවා යාකර බැම්ම තැනිය හැකි බවත් ඒ දෙක අතර හොඳ සවි ඇති තිරිවානා තට්ටුවක් තිබෙන බවත් සනාථ විය. වැව සෑදීමට සියල්ල ගැළපී තිබුණේ ඒ අසදෘෂ නරපතියා විසින් මිණිහිරිවාපිය නොසාදාම බැරි තත්ත්වයකට පත්කරමින්ය. අවසානයේ රජතුමා වැව සෑදීමට පටන් ගත්තේය. නළුදෑකඩ රාළ නැමැති විශ්ව කර්ම වාරි තාක්ෂණවේදියා සමඟ දහසක පිරිසක් වහා ඒ බිමට යවන ලදී. මෙම ප්‍රදේශය ගෝත්‍රිකයන්ගේ පාරම්පරික ගොදුරු බිමක් විය. දෙපිරිස අතර මහ ගැටුම් ඇතිවිය. නළුවා සටනින් මිය ගියේය. නයිලවන්නියා සහ කට්ටම් පට්ටියා ද මරා දමා වැව සෑදිය හැකි වුවත් රජතුමාට අවශ්‍ය වූයේ රට තුළ ලේ නොව ජලය ගලා යනු දකින්නටය. මහ සටන හෙට කියා තිබියදී මහසෙන් නායකයා යක්ෂ දෙබෑයන්ගේ පැලට තනිව ගියේය. මම මහසෙන්, ජනතාව නොමරා අපිට මේ ප්‍රශ්නෙ විසඳා ගන්න ක්‍රමයක් ඇත්තේම නැද්ද යි රජ ඇසිය. ඔවුන්ට අදහාගත නොහැකි විය. ඒ සාකච්ඡාව කෙළවර වූයේ වැවට අවශ්‍ය භූමි භාගය ලබා දීමෙන්ය. වැව හදන්නට විය. එහෙත් වැව් බැම්මේ එක්තැනක් කොපමණ හැදුවත් කැඩෙන්නට විය. වසර හතක් තිස්සේ මෙය සිදුවිය. "තොපි මගේ අඩවියට ඇවිත් මා මරා දැම්මා රාජ ලේ ඇති බිල්ලක් දෙන තෙක් ඕක හදන්න දෙන්නේ නෑ"යැයි මිය ගිය යක්ෂ නායකයා නළුවා රජුට හීනෙන් පෙනි සිට කීය. එහෙත් කිසි රජ බිසවක් තම දරුවා වැවක් වෙනුවෙන් පුද දෙන්නට එකඟ වූයේ නැත. එය දැන ගත් රජුගේ නැගණිය බිසෝ බණ්ඩාර දේවිය තම දරුවා වැව වෙනුවෙන් දන් දුන්නාය. අංග සම්පූර්ණ රජ ඇඳුමෙන් සැරසූ ඒ කුමාරයා මව විසින්ම රජුට භාර දෙන ලදී. එහෙත් අවසානයේ දරුවා බිලි නොදී ඒ වෙනුවෙන් ප්‍රයෝගයක් කොට නළු වළසෙකු බිලිදී බැම්ම සාදන ලදී. මෙය නළුදෑකඩරාළලා විසින් කරන ලද ප්‍රයෝගයක් යැයි ඉතිහාස පොත් පත්වල සඳහන්ය. ප්‍රයෝගයන් නොදත් රජ ඒ දරුවාගේ මරණය පිළිබඳව අධීක ශෝකයෙන් පසුවිය. එය දැනගත් පිරිස සමාව ඉල්ලා තමන් කළ ප්‍රයෝගය හෙළි කොට දරුවා රජ ඉදිරියට පැමිණ වූහ. බේරාගත් ඒ හිඟුරණ බණ්ඩාර කුමාරයා නැවත රජු ඉදිරියට පමුණුවන තෙක් කලක් සඟවා තබන ලද්දේ හිඟුරක්ගල මුදුනේය. නළුවා ප්‍රයෝගය දැන ගත් බවත් රජුගේ උදාර පරමාර්ථය හමුවේ ඔහු රජුට සමාව දුන් බවත් කියැවේ. බිසෝ කොටුව තනන ලද්දේ තනිකර කළු ගලෙනි. හෙළයන් වාපි තාක්ෂණයේ කූට ප්‍රාප්තිය සනිටුහන් කළේ මහසෙන් රජුගේ කාලයේදී යැයි දේශයේ පුරාවිද්‍යාඥ ප්‍රාඥ ආචාර්ය සෙනරත් පරණවිතානයන් පවසා තිබේ. එහි අරුතක් ඇත්තේ මිණිහිරිවාපිය දැවැන්ත වැවක් වූවාට එහි බැම්ම පොඩි වැවක තරමේ එකක් බැවිනි. නළුදැකඩ රාළ ඉතිහාසගත වන්නේ ඒ නිසාය. වසභ, මහසෙන්, ධාතුසේන, පැරකුම් වැනි නර ශ්‍රේෂ්ඨයන්ට මල් තියා වඳින්නට වටින්නේ මෙවැනි ප්‍රශ්න ඇති නොවන ආකාරයට ජලසම්පාදනය කළ හෙයිනි. ජලය යනු ජන හිතකාමී රජවරුන් ගේ ධනය ය. 'අහසින් වැටෙන එක් දිය බිඳුවක්වත්, වැඩක් නොගෙන සාගරයට නො යැවිය යුතු’යැයි මහා පැරකුම් නිරිඳුන් පවසා තිබේ. ධාතුසේන රජතුමා කාශපයට මා හම්බ කළ ධනය මේ යැයි කියා කලා වැවේ දිය පෙන්වා තිබේ. ඇළහැර යෝධ ඇළේ තිබෙන ඔරු බැදි සියඹලාව නැමැති ඉපැරැණි වෘක්ෂය හා මහසෙන් රාජ නාමයට එකට බැඳී ඇති බව කියති. මින්නේරිය වැවට යාබදව කුඩා වැව් ද ඇත. ලංකාව ඉංග්‍රීසීන්ට යටත්වූ අවදියේ මින්නේරියට ආ ජෝන් ඩෙව් වැවේ සොරොව්වේ රූපයක් පවා ඇඳ තිබේ. 50 දශකයේ මින්නේරිය වැවේ බැම්ම කඩාගෙන යන බවට තොරතුරු දිවංගත සී. පී. ද සිල්වා මහතාට දැන ගැනීමෙන් පසුව එතුමා ඒ ස්ථානයට පැමිණ වැවට වැඳ විනාශයක් කරන්න එපා යැයි සිය අත රැඳි මුදුව ජලාශයට පුජා කල බව මින්නේරිය ජනතාව පවසති. මින්නේරිය වැව යටතේ මින්නේරිය හා ගල් අමුණ නමින් ගොවි ව්‍යාපාර දෙකක් ඇත. මෙහි අක්කර ප්‍රමාණය අක්කර 22,000කි. මින්නේරිය වැව් බැම්ම මත හා එයට යාබද රජ ඇළ ප්‍රදේශයේ දේවාල දෙකක් පිහිටා ඇත.

Friday, June 28, 2019

දියුණුව.. හා දියුණු වෙමින් පවතින..

ටොරොන්ටෝ නුවර උසාවි කාමරයේ නිශ්ශබ්ද තාවය බිඳගෙන මහා හඬින් ජංගම දුරකථනයක් නාද උනා. වම් පැත්තේ ආසන පෙළේ වාඩි වෙලා හිටපු මැදිවිය ඉක්මවූ කාන්තාවක් කලබලයෙන් ඇගේ අත්බෑගයට අත පොවනවා.
"ප්ලීස් ස්විච් ඕෆ් ඕල් යුව ඉලෙක්ට්‍රොනික් ඩිවයිසස් වයිල් කෝට් ඉස් ඉන් සෙෂන්" කියලා උසාවි ලිපිකරු කෑගැහුවා. විනිශ්චයකරු ඔලුව උස්සලා වත් බැලුවේ නෑ. කටයුතු සාමාන්‍ය විදියටම සිදු වෙනවා. පැය භාගයකින් විතර ඒ විදිහටම ආපහු දුරකථන නාදයක් ඇහුණා. අර කාන්තාවම කලබලයෙන් ආපහු බෑග් එකට අත දානවා පෙනුනා. තව විනාඩි දහයකින් විතර ඒ දේම ආපහු වුනා. "පව් මේ මනුස්සයා ෆෝන් එක සයිලන්ට් දාන විදිහ දන්නේ නැහැ" මට හිතුනා.
මට ඉස්සරහ පේලියේ වාඩි වෙලා හිටියේ අවුරුදු 25ක විතර තරුණයෙක්. කොට කලිසමක් සහ ටෑන්ක් ටොප් එකක් ඇඳලා හිටපු ඔහුගේ ඇඟේ කොච්චර පච්ච කොටලා තිබුණාද කිව්වොත් තව එක පච්චයක්වත් කොටන්න ඉඩ තිබුනේ නෑ කියලා මට හිතුනා. ඔහු තැනින් තැන කරාබු දහයක් පහළොවක් ම එල්ලගෙන තිබුණා. ටික වෙලාවකින් ඔහුගේ නම කියල කතා කරහම ඔහු ගිහිල්ල ඉස්සරහ හිටගත්තා. විනිශ්චයකරු ඔහුට යම් දෙයක් විස්තර කරලා, නඩු විභාගයට දවසක් නියම කරලා එදාට උසාවියේ පෙනී සිටින්න කියලත් කිව්වා. "ස්තුතියි" කියලා ඔහු යන්න ගියා.
මට දකුණු පැත්තෙ පේලියේ වාඩි වෙලා හිටපු කළු තරුණිය ඇඳලා හිටපු ඇඳුමෙන් ඇයගේ සිරුරේ ආවරණය වෙලා තිබුණ ප්‍රමාණයට වඩා නිරාවරණය වෙලා තිබිච්ච ප්‍රමාණය බොහොම වැඩියි. ලංකාවේ සම්මතය අනුව කියනවනං හිටියෙ අඩ නිරුවතින් නෙවෙයි තුන්කාලක් විතර නිරුවතින් කියන්න පුළුවන්. එයත් ඉස්සරහට ගිහින් පොලිස් නිලධාරීන් මාංචු දාලා ගෙනාපු එයාගේ සහෝදරියට ඇපකාරිය ලෙස ඉදිරිපත් වෙලා විනිශ්චයකරුගෙ ප්‍රශ්න වලට උත්තර දුන්නා.
මේ මම කැනඩාවේ උසාවියකට ගිය පළමු අවස්ථාව වූ නිසා, විනිශ්චයකරු මේවා ගැන වගේ වගක් නැතුව ඉන්නෙ මොකද කියලා මට හරි ප්‍රශ්නයක්.
පස්සේ මම මෙහෙම හිතාගත්තා...
"උසාවියේ ගෞරවය රැඳී තියෙන්නේ තමන් ලබා දෙන තීන්දුව කොයිතරම් සාධාරණ සහ ගෞරවනීය ද කියන එක මත මිසක්, යුක්තිය පසිඳලන කටයුතුවලට කිසිසේත්ම අදාළ නොවන කරුණු මත නොවන බව මේ නඩුකාරයාට සමහරවිට තේරුම් ගිහිල්ලා ඇති".
- Jayantha Wijesinghe -

බීම හා පොලිසිය.. 1 😂😂

මාතෘකාව කියවද්දිම නිකං හි⁣තුනද මුං මහ බේබද්දෝ කියලා.. නෑ.. බේ බද්දෝ කියන්නේ දවස ගානේ අන්දෝ සංසාරයක් නැතිව පොලුපාරක් හරි වදිනවනම් ගහන අය කියලා පුරාණ ඍෂිවරයෙක් පොල් කොලේකද කොහෙද ලියලා තිබ්බා කියලා අපේ හෙල්මට් මාමා ⁣ඒ දවස්වල බොන වෙලාවක කිව්වා කියලා යාන්තමට මීටර් වෙනවා.. වැල් වටාරම් නිකම් වැඩිද මංදා.. ඒ හින්දා කථාවට බහිමුකෝ..
  මාස ගානකින් මොනවත් බොලොග් පොජ්ජේ කොටන්න බැරි උනේ එක එක වැඩ රාජකාරී නිසාම නමි කියලා මුසාවාදා දොඩන්ඩ බෑ.. කම්මැලිකමත් තිබුනා ආයුබෝවන්ඩ.. මේ ඊයේ පෙරේදා කණ්ඩයියා මරණ තර්ජන කොරන තැනටම ආව ඕං කොටන්ඩ කියාලා.. එහෙනම් ඕං මහා බේබදු අලංකාරයේ නෙකී කථාවක් ලියන්ඩ තමා යන්නේ...
   මේ සිද්ධිය වෙනකොට මංතුමා කොලොම්තොට අර හොනරබල්ලා ඉන්න පැත්තේ ඇනෙක්ෂ් එකක් අරං ගෙදර උන්දෑ සමග දැහෙමෙන් සෙමෙන් ඉද හිටලා ත්‍රීවීලර් හයර් එකක් දුවාන හිටපු කාලේනොවැ..ඉතිං මම කොලොම්තොට ඉද්දි මගේ අතිපජාත පාප මිත්‍ර කුකුල්තොමෝටත් එදාවේල සරි කොර ගන්න විදිහක් නැතුව ඔය තලවතුගොඩ පැත්තේ තියෙන අර යොහෝවාද කාගෙද පල්ලියක අලුතින් හදන බිල්ඩිං එහෙක පොටි බාස් කෙනෙක් විදිහට වැඩට ආවා..
ඉතිං මාත් මාස ගානකින් කුකුල්තොමෝ බැහැදැකපු නැති නිසා නමෝ විත්තියෙන් තලවතුගොඩ පැත්තේ හයර් එකක් යද්දි කුකුල්තෙමෝව සිහිවෙලා ෆොන් පොජ්ජෙන් කෝල් පොජ්ජක් අරගෙන ඉන්න තැන හොයාන හොයාන ගිහින් බැහැදැක්කා..
 - අඩෝ ගොඩ දවසකින්නේද?? මොනවා හරි කරමුද?
මංතුමා- (ඉබ්බා දියේ දැම්මා වාගේ) යමං යමං එහෙනම්...
දැං ඉතිං තලවතුගොඩ keels super එකට ගිහින් තෝරලා තෝරලා ඩ්‍රයිජින් බාගෙකුයි අඩුවැඩියයි අරං තුන්රෝදේ නැගී පාර්ලිමේන්තුව පැත්තට එනවා..
 - කොහෙද බං ⁣සෙට්වෙන්නේ?
මංතුමා - එහේවාගේ  මෙහේ බෑනේ බං... ඔය පාක් එකක් අයිනේවත් සෙට් වෙමු.
ඔහොම රවුම් දෙක තුනක් ගිහින් දියවන්නා මංතීරැවේ වෙල් යායේ මැදින් යන පාරේ අයිනකට දාගෙන අපි දෙන්නා ලාවට හීනියට පාවිච්චි කරනවා..
ඔය අතරේ මැෂිමක් ගැන මොකක්ද එකක් අැහුවා කුකුලා.. මම ඉතිං මහන මැෂිං ගැන දන්න ලබ්බක් නැති නිසා අටං උතුමාණන්ට දුරබනුවෙන් කෝල් එකක් අරං කුකුලා අතට දීලා ලාවට සිංදුවක් ප්ලේ කරං ඉද්දි වේගෙන් ආපු බයික් එකක් නතර කලා..
නිකං බයික් එකක් නෙවෙයි ට්‍රැෆික් බයික් එකක්... ආයුබෝවන්ඩ.. ට සිරි කිව්වලු.
ට්‍රැෆික් රාලහාමි 1- තමුසෙලා මොකද මෙතන කරන්⁣නේ...?? ගන්නවා id
ට්‍රැෆික් රාලහාමි 2- සර් මුං තමා.. කෝල් එක හරි.. මේං එම්ටිය.. ගහපු පරයා දෙකට කැඩෙන්න.. මෙතන බොන තැනක්ද යකෝ...$&&%@&@#$$&@*@&*;$@@@&@*@#
 - (සිද්ධිය වෙද්දි පොර අටමා සමග සංවාදයේ..) ඇයි සර්..
පො.රා.1- අපිට 119 එකක් ආවා මෙතන නන්නාඳුනන කට්ටියක ඉන්නවා කියලා..
මංතුමා -  අනේ සර් අපි මෙහේ නෙවෙයි ⁣කූලී වැඩක් හොයාන ආවේ. තලවතුගොඩ වැඩකර කර හිටියේ දවසේ පඩියට. එතන ලොකුබාස් පඩිත් නොදී පැනලා ගියා සර්.. කරගන්න දෙයක් නැතුව ඉන්නේ..
 - අනේ ඔව් සර් අපි දෙන්නාම එකම ගමේ බොරැනම් බලන්න සර් id
පො.රා.2 - මුංගේ බොරැ සර්.. මුං මන්කොල්ල කාරයෝද කොහෙද? අරං යමු පොලිසියට...
 - අනේ එහෙම නෑ සර්.. අපි දුකට අතේ තිබ්බ සල්ලි වලින් බීවේ.. හෙට උදේ වෙද්දි ගමට යනවා..
මංතුමා- අනේ ඔවි සර්.. හයර් එකක්වත් දුවන්න මෙහේ පාරවල් දන්නෙත් නෑනේ.. අනික සර් අපි ගමේ බොන්නේ වෙල් අයිනේනේ.. ඒ පුරැද්දට මෙතනට ආවේ...
පො. රා. 2 - මුං සල්ලි නැතුව බොන්නෙත් ඩ්‍රයි ජින්.. අපි බොන්නේ යකෝ ගල්..
මංතුමා - එහෙම කරන්න එපා සර්... සරැත් ගමේ කොල්ලෙක්... අපිත් එහෙමයි.. (සාජන් මහතා රජරට පොරක් විත්තිය දැනිලා තිබ්බේ.. අනික කොල්ලෙක්.. කොස්තාපල් නම් ගෙන්දගම් පොලොවේ පොරක් හෙට අනිද්දාට වලකජ්ජගහන සයිස් එකක්)
පො.රා.1 - ඒ උනාට මල්ලිලා බෑනේ 119 වලට අපි රිපෝට් කරනන එපැයි..
 - සේප් එකක් දාන්න සර්.. අපි අනාත වෙලා නේ ඉන්නේ.. ⁣අරංගියොත් උසාවි නේ.. ⁣දඩ ගෙවන්න තියා අවුරැද්දේ කිරිබත් උයන්න හාල් ගන්නවත් විදිහක් නෑ සර්..
පො.රා.2- (ත්‍රීවීලර් එකට නැගලා) අරං යමු සර්..
මංතුමා - එහෙම කරන්න එපා සර්.. බලන්න අර ඇමති පුත්තු ඔයාලගේ අයම යට කරලා ගියත් ඇහැක් ඇරල බලන්නේ නෑ.  අසරණ අපිට තමා නීතිය.. සොරි සර් බීලනේ.. ගනන් ගන්න එපා..
පො.රා.1 - හා හා මම කියන්නම් අපි එද්දි හිටියේ නෑ කියලා.. දැං මෙතන ඉන්නේ නැතුව හෙමීට යන්න. ඔය ඔතන ඉස්සරහ ⁣පාරෙන් යන්න කෙලින්ම තලවතුගොඩ හංදියට.. එහේ මේ වෙලාවට පොලිසිය නෑ.. පරිස්සමින් යන්න මල්ලිලා.. ආ ගිනි පෙට්ටියක් තියෙනවාද..
 - ආ සර්..
පො.රා.1 - (සිගරැට් එකක් පත්තු කරලා ඒක කුකුලාට දීලා, වීල් එකේ යතුරයි, id එහෙමත් දීලා) අපි යනවා.. දැන්මම යන් ඕන.. ආයේ එහෙම පාරවල් ගානේ බොනවා නෙවෙයි.. අර සමනල එක තියෙන්නේ ඒකට ගිහින් බීවනම් ප්‍රශ්නයක් නෑනේ..
ඔන්න ඉතිං කුකුලව සයිට් එකෙන් දාලා තව හයර් දෙක තුනකුත් දුවලා ගෙදරට ආවා.. පස්සේ දවසක ඇඹුල්දෙණිය හංදියේදි අර ට්‍රැෆික් මහතා මූනට මූන හම්බ උනා.. හිනාවක් දාලා ආවා ඉතිං..
මොනවා උනත් ආන් මහත්වරැ...